ఇదో తరహా మోసం..
- బ్యాంక్‌ అకౌంటర్‌ వివరాలు ఎవరికీ ఇవ్వొద్దు
- వివరాలిచ్చిన వారు కేసుల పాలయ్యే ఛాన్స్‌
పీపుల్స్‌డైరీ`హైదరాబాద్‌ : ఇటీవల కాలంలో సైబర్‌ నేరగాళ్లు రెచ్చిపోతున్నారు. రకరకాల పద్ధతుల్లో మోసాలకు పాల్పడుతున్నారు. రోజుకో తరహా కొత్త మార్గంలో అమాయకులను బురిడీ కొట్టిస్తున్నారు. కొందర్ని డ్రగ్స్‌ పార్శిల్స్‌ పేరిట బెదిరించి అక్రమ వసూళ్లకు పాల్పడుతున్నారు. తాము చెప్పిన అకౌంట్లలో డబ్బులు వేయాలంటూ బెదిరిస్తున్నారు. ఇలా అక్రమంగా వచ్చే డబ్బులు జమ చేసేందుకు కేటుగాళ్లు కమీషన్లు ఇచ్చి బ్యాంకు ఖాతాలు సెటప్‌ చేసుకుంటున్నారు. పలువురి వద్ద నుంచి బ్యాంక్‌ అకౌంట్లు తీసుకొని నెలవారీ కమీషన్లు ఇస్తున్నారు. ఇలా సైబర్‌ కేటుగాళ్ల మాటలు నమ్మి బ్యాంకు అకౌంట్లు ఇస్తే జైలుకు వెళ్లటం ఖాయం. తాజాగా హైదరాబాద్‌ ముషీరాబాద్‌కు చెందిన అలీబేగ్‌ అనే వ్యక్తి తన బావ అస్లాం సూచనతో బ్యాంకు అకౌంట్‌ లావాదేవీలను ఓ వ్యక్తికి అప్పగించాడు. సైబర్‌ నేరాలకు పాల్పడే సదరు వ్యక్తి అలీబేగ్‌ అకౌంట్‌ ద్వారా లక్షల్లో లావాదేవీలు జరిపాడు. సైబర్‌ మోసాల్లో బాధితులు వేసే డబ్బు అలీబేగ్‌ ఖాతాలో చేరుతున్నట్లు పోలీసులు గుర్తించారు. రంగంలోకి దిగిన సైబర్‌ క్రైమ్‌ పోలీసులు అలీబేగ్‌ను అరెస్టు చేసారు. అయితే తనకేం తెలియదని.. తన బావ అస్లాం చెబితే అకౌంట్‌ ఇచ్చానని అలీ వెల్లడిరచాడు. ఇదే తరహాలో మరికొంత మంది నుంచి బ్యాంక్‌ అకౌంట్లు సేకరించిన అస్లాం వాటిని విదేశాలకు పంపినట్లు విచారణలో వెల్లడైంది. హైదరాబాద్‌ నగరంలో చిన్న చిన్న వ్యాపారాలు చేసుకునేవారు నిరుద్యోగులు, పాతనేరస్థులను టార్గెట్‌గా చేసుకొని బ్యాంకు అకౌంట్లు తీసుకుంటున్నారు. వారి పేర్లతో నకిలీ సంస్థలను సృష్టించి కరెంట్‌ అకౌంట్లు ఓపెన్‌ చేయిస్తున్నారు. ఇలా బ్యాంకు అకౌంట్లు ఇచ్చిన వారికి నెలకు రూ.5-10 వేలు, కొందరికి బ్యాంకు ట్రాన్సక్షన్స్‌పై 10 శాతం కమీషన్‌ చొప్పున ఇస్తున్నారు. బాధితుల నుంచి వచ్చే డబ్బును యూపీఐ ద్వారా మళ్లీ వేర్వేరు ఖాతాల్లోకి బదిలీ చేస్తున్నారు. ఆ నగదును మనీట్రాన్స్‌ఫర్‌ ఏజెన్సీల ద్వారా విదేశాలకు పంపుతున్నారు. అక్కడ నగదు క్రిప్టోగా మారి చైనాకు చేరుతున్నట్లు పోలీసులు గుర్తించారు. ఎవరికి బ్యాంకు అకౌంట్లు ఇవ్వవద్దని.. అలా అకౌంట్లు ఇచ్చి సైబర్‌ నేరాల కేసుల్లో చిక్కుకోవద్దని పోలీసులు హెచ్చరిస్తున్నారు.