పీపుల్స్‌డైరీ`న్యూఢల్లీి : భారతీయ రైల్వే కీలక నిర్ణయం తీసుకుంది. రైల్వేకు సంబంధించిన అన్ని రకాల సేవలను ఒకే చోట అందించేందుకు ఓ సూపర్‌ యాప్‌ తీసుకొస్తూ అదిరే శుభవార్త చెప్పింది. ఈ సూపర్‌ యాప్‌ త్వరలోనే అందుబాటులోకి రానుంది. డిసెంబర్‌ చివరి నాటికి ఈ సూపర్‌ యాప్‌ లాంచ్‌ చేసేందుకు భారతీయ రైల్వే సన్నాహాలు చేస్తున్నట్లు రైల్వే వర్గాలు తెలిపాయి. ప్రస్తుతం రైల్వేకు సంబంధించిన సేవలు పొందేందుకు ప్రయాణికులు వేరు వేరు వెబ్‌సైట్లు, యాప్స్‌ ఉపయోగించాల్సి వస్తోంది. ఉదాహరణకు ఆన్‌లైన్‌ టికెట్‌ బుకింగ్‌ కోసం ఐఆర్‌సీటీసీ రైల్‌ కనెక్ట్‌, అన్‌ రిజర్వ్‌డ్‌ టికెట్లకు యూటీఎస్‌ యాప్‌, ఫుడ్‌ ఆర్డర్‌ చేసేందుకు ఐఆర్‌సీటీసీ ఈ కేటరింగ్‌ ఫుడ్‌ ఆన్‌ ట్రాక్‌, కంప్లెయింట్స్‌ చేసేందుకు, ఫీడ్‌ బ్యాక్‌ నమోదుకు రైల్‌ మదద్‌ వంటి యాప్స్‌ వాడాల్సి వస్తోంది. అలాగే నేషనల్‌ ట్రైన్‌ ఎంక్వైరీ సిస్టమ్‌ ద్వారా ట్రైన్‌ ట్రాకింగ్‌ చేయాల్సి వస్తోంది. ఒక్కో సర్వీసు కోసం ఒక్కో యాప్‌, వెబ్‌సైట్‌ వాడాల్సి వస్తోంది. దీంతో చాలా మంది ఏది దేనికోసమో తెలియక ఇబ్బందులు పడుతున్నారు. ఇప్పుడు ఈ సేవలన్నింటినీ సూపర్‌ యాప్‌ ద్వారా ఒకేచోట అందించనుంది. ఈ సూపర్‌ యాప్‌ను సెంటర్‌ ఫర్‌ రైల్వే ఇన్ఫర్మేషన్‌ సిస్టమ్‌ అభివృద్ధి చేస్తున్నట్లు రైల్వే వర్గాలు తెలిపాయి. ఇప్పటికే యాప్‌ సిద్ధమైందని, దానిని ఇండియన్‌ రైల్వే కేటరింగ్‌ అండ్‌ టూరిజం కార్పొరేషన్‌తో అనుసంధానం చేసే ప్రక్రియ కొనసాగుతోందని ఓ ఉన్నతాధికారి చెప్పినట్లు జాతీయ మీడియాల్లో వార్తలు వస్తున్నాయి. ఈ సూపర్‌ యాప్‌ గనక అందుబాటులోకి వచ్చినట్లయితే ట్రైన్‌ టికెట్‌ బుకింగ్‌ సహా ప్లాట్‌ ఫామ్‌ టికెట్‌, అన్‌ రిజర్వ్డ్‌ టికెట్ల అన్నింటినీ ఒకే చోట బుక్‌ చేసుకోవచ్చు. తాము ప్రయాణించాల్సిన ట్రైన్‌ రన్నింగ్‌ స్టేటస్‌ సైతం ఈజీగా ట్రాక్‌ చేయవచ్చు. ప్రస్తుతం ఈ సేవలన్నీ ఒకే చోట పొందేందుకు చాలా మంది రైల్వే ప్రయాణికులు థర్డ్‌ పార్టీ యాప్స్‌పై ఆధారపడుతున్నారు. ఈ సూపర్‌ యాప్‌ అందుబాటులోకి వస్తే తరుచూ రైల్వే ప్రయాణం చేసే వారికి ఎంతగానో ఉపయోగకరంగా ఉండనుంది.

The post రైల్వేశాఖ సూపర్‌ న్యూస్‌! first appeared on People's Diary.