సుడా.. మరింత బడా…
- విస్తరించిన కరీంనగర్‌ శాతవాహన అర్బన్‌ డెవలప్‌మెంట్‌ అథారిటీ
- 147 గ్రామాల విలీనం
పీపుల్స్‌డైరీ`కరీంనగర్‌ : ఉమ్మడి కరీంనగర్‌ జిల్లాకు సంబంధించి రాష్ట్ర ప్రభుత్వం కీలక నిర్ణయం తీసుకుంది. కొన్ని గ్రామాలు మినహా కరీంనగర్‌ జిల్లాలోని దాదాపు అన్ని ప్రాంతాలు త్వరలో మరిన్ని సుడా పరిధిలోకి రానున్నాయి. కరీంనగర్‌లోని శాతవాహన అర్బన్‌ డెవలప్‌మెంట్‌ అథారిటీలో పలు గ్రామాలను విలీనం చేస్తూ జీవో నంబర్‌ 188 జారీ చేసింది. రామగుండం అర్బన్‌ డెవలప్‌మెంట్‌ అథారిటీని ఏర్పాటు చేయడంతో పాటు, వేములవాడ టెంపుల్‌ డెవలప్‌మెంట్‌ అథారిటీ విస్తరణకు జిఓలు జారీ చేసింది. జగిత్యాల అర్బన్‌ డెవలప్‌మెంట్‌ అథారిటీని ఏర్పాటు చేయాలనే ఆలోచన కూడా ప్రభుత్వం పరిశీలిస్తోందని సమాచారం. కరీంనగర్‌ మున్సిపల్‌ కార్పొరేషన్‌, కొత్తపల్లి మున్సిపాలిటీలో ఉన్న 147 గ్రామాలను సుడాలో విలీనం చేస్తూ జీఓ 188 జారీ చేశారు. కొత్త జీవో ప్రకారం హుజూరాబాద్‌, జమ్మికుంట, చొప్పదండి మున్సిపాలిటీలు కూడా సుడా పరిధిలోకి రానున్నాయి. ఈ మున్సిపాలిటీలతో పాటు 147 గ్రామాలు కూడా దీని పరిధిలోకి రానున్నాయి. వేములవాడ ఆలయ అభివృద్ధికి ఏర్పాటైన వేములవాడ టెంపుల్‌ డెవలప్‌మెంట్‌ అథారిటీ (వీటీడీఏ)ని రాజన్న-సిరిసిల్ల జిల్లా మొత్తానికి విస్తరించారు. వేములవాడ మున్సిపాలిటీతో పాటు 11 గ్రామాలు వీటీడీఏ పరిధిలో ఉన్నాయి. సిరిసిల్ల మున్సిపాలిటీతో పాటు వేములవాడ రూరల్‌, బోయిన్‌పల్లి, ఇల్లంతకుంట, ఎల్లారెడ్డిపేట్‌, వీర్నపల్లి, ముస్తాబాద్‌, గంబీరావుపేట, చందుర్తి, రుద్రంగి, కోనరావుపేట మండలాల పరిధిలోని 152 రెవెన్యూ గ్రామాలను విలీనం చేస్తూ జీవో 184 జారీ అయింది. రామగుండం అసెంబ్లీ నియోజకవర్గంతో పాటు పెద్దపల్లి, మంథని, ధర్మపురి సెగ్మెంట్లలోని కొన్ని ప్రాంతాలతో పాటు రామగుండం అర్బన్‌ డెవలప్‌మెంట్‌ అథారిటీ (రూడా) ఏర్పాటైంది. ఇందుకు సంబంధించి జీఓ 165 జారీ చేశారు. రామగుండం మున్సిపల్‌ కార్పొరేషన్‌తో పాటు పెద్దపల్లి, సుల్తానాబాద్‌, మంథని మున్సిపాలిటీలు, పెద్దపల్లి, జూలపల్లి, అంతర్‌గావ్‌, పాలకుర్తి, ధర్మారం, ఎలిగేడ్‌, ఓడేడ్‌, సుల్తానాబాద్‌, మంథని, రామగిరి, కాల్వశ్రీరాంపూర్‌, ముత్తారం, కమాన్‌పూర్‌ మండలాల్లోని 198 గ్రామాలు ఆర్‌యూడీఏ పరిధిలోకి వస్తాయి.జగిత్యాల అర్బన్‌ డెవలప్‌మెంట్‌ అథారిటీని ఏర్పాటు చేయాలనే ప్రతిపాదన ప్రభుత్వం వద్ద ఉంది. ప్రభుత్వం త్వరలోనే దీనిపై నిర్ణయం తీసుకోవచ్చు.